亞洲股神東尼 (Tony Measor) 係本港出名嘅價值投資者，曾經撰寫無數投資文章，原來佢背後仲有一個幕後功臣─佢嘅好朋友、力寶證券投資經理艾薩 (Isaac Sofaer) 。自從舊年 3月起，艾薩為東尼代筆撰寫專欄，佢同東尼一樣，都係價值投資者，喜歡長線投資。
恒指 2041年 料見 46萬點
艾薩預測恒指同一般人好唔同，佢認為 2041年恒指會升到去 46萬點！即係家恒指嘅 20倍，「呢個係用複合年增長率 10%計算，係過去 30年複合年增長率嘅一半。」過去一年，好多唔同嘅消息令股市大上大落，包括美國第二輪量化寬鬆措施 (QE2) ，艾薩接受本報專訪時就話：「聯儲局僅以 0.5%發債，以 3厘回購債券，冇額外流動性，冇錢去中國，亦冇股市因此被炒賣，唔好相信嗰啲說話，都係大話。」艾薩仲話，如果因為美國或者中國有錢嚟而買股票嘅話，咁就係愚蠢。佢話佢嘅投資要訣係：「買股票係因為股票優質！」至於點樣揀股，佢鍾意睇現金流，「現金流係公司優勢嘅真正測驗，係股東真正可以享有嘅收入。純利可以受到好多因素影響，但你唔能夠喺現金流上撒謊。」佢以 25年嘅預測現金流計算折現，再用嚟同市價比較。佢指出，如果公司結構簡單，仲有趨勢一致嘅收入，就唔難預測公司嘅未來現金流，「畢菲特都係咁樣揀股票 o架！」咁要揸隻股票幾耐？艾薩認為冇必要出售優質股，因為優質股嘅增長比現金更好，佢只會喺需要用錢嘅時候先至沽貨。不過，公司有新陳代謝，人亦有生老病死，賭王何鴻燊呢排頻頻轉讓股權畀屋企人，令人開始關注一啲本地藍籌股嘅繼承問題，長線投資者又應該點樣面對？
家族出現唔少風波嘅新地 (016) ，艾薩就話，如果郭氏兄弟嘅阿媽過世，新地會分家，「郭氏三兄弟都非常聰明，都受過佢阿爸嘅教導，其中一人已經開展自己嘅生意，佢哋想分家，只係家郭老太仍然健在，一直防止呢啲事發生。」若果出現分家，可能會賣公司部份資產，股價將會上升，「照市值睇，中國嘅大企業或者香港一啲人，可以輕易收購，呢個並唔係大問題。」
長實無李嘉誠 會跌落$60
「你唔能夠話長實 (001) 欠缺李嘉誠仍然會係長實。」佢預測，如果李嘉誠去世，長實嘅股價會跌到去 60蚊，「我唔知道李嘉誠有冇關心佢身後公司前景點樣，由邊個接管，但係家就算佢年事已高，大家仍然叫佢做『李超人』，覺得佢有魔術手。如果佢過身，對股價表現肯定係負面，因為冇人對繼承人有信心。」記者：高明輝
艾薩心水股 •工商銀行 (1398) 上周五收報： 5.79元•農業銀行 (1288) 上周五收報： 3.90元•渣打集團 (2888) 上周五收報： 211.80元•新鴻基地產 (016) 上周五收報： 129.10元•太古 A (019) 上周五收報： 127.80元•瑞安房地產 (272) 上周五收報： 3.74元
艾薩簡歷 現職：管理私人投資戶口、《東尼日誌》代筆資歷：英國註冊會計師投資經驗：逾 30年研究市場：香港、中國、泰國及澳洲經驗： 1988年任職 Hill Samuel基金經理，至 1991年加入力寶證券任基金經理往積：管理的環球投資於 1991至 2000年間增長 14倍，即每年約 30%增長
艾薩（圖）同東尼一樣，都係價值投資者。惺惺相惜同東尼 22年交情 定期把酒論股
同東尼有 22年交情嘅艾薩，除咗股票之外，共同嗜好就係飲酒，過去 21年嚟曾經定期一齊開餐兼講股。據艾薩講，東尼第一隻建議佢買嘅股票係寶隆洋行 (East Asiatic) ，當時係 88至 89年間，隻股本來 1蚊，後來跌到 6毫。當時東尼係經紀，佢係基金經理，東尼向佢介紹呢間係好好嘅老牌貿易公司、有好好嘅產品，「東尼話呢隻股份家好平，但係可以更平」，佢持有呢隻股，後來跌到 5毫，之後雖然有被收購嘅利好消息，但係仍然蝕本離場。
東尼首薦股 蝕錢惹反思
後來艾薩反思點解蝕錢，「第一，呢隻股唔流通；第二，冇人跟進呢隻股。呢隻股表現好，但係市盈率只係 4至 5倍。盈利良好，市盈率應該值 20倍，但係就冇得到跟進。」所以，艾薩都係回到最初，買藍籌股。佢話：「若果想賺錢就要緊貼市場嘅領導者，就算有大事發生都唔會損失太多。」佢認為，嗰啲知識當時東尼已經知，家佢亦已經學懂，「佢冇教我，但係我由佢嘅態度，由佢嘅身上學懂咗大部份。」但兩人嘅意見亦唔係完全一致，東尼嘅愛股係滙控 (005) ，作為朋友嘅佢就較睇好渣打 (2888) ，「渣打會有更好嘅營銷能力，會持續增長，比滙控更好。」
「亞洲股神」東尼，同艾薩相識 22年。
